बुधबार १२ माघ २०७८

‘नारायणहिटीमा रेस्टुरेन्ट चलाउन रोकेर राम्राे गर्नुभाे’ भन्दै प्रधानमन्त्रीले दिए धन्यवाद

काठमाडौँ -: नारायणहिटी दरबार संग्रहालय परिसरमा निजी व्यवसायीलाई भाडामा दिएर रेस्टुरेन्ट व्यवसाय चलाउन खोज्दा पर्यटनमन्त्री प्रेम आलेले रोक लगाएका छन् । मन्त्री आलेले राम्रो गरेको भन्दै प्रधानमन्त्री शेरबहादुर देउवाले धन्यवाद दिएका छन् ।

ऐतिहासिक महत्वको दरबार संग्रहालयभित्रै व्यवसाय चलाउने तयारी भइरहेको समाचार बाहिरिएपछि सर्वत्र आलोचना भएको थियो । पूर्ववर्ती सरकारमा तत्कालीन पर्यटनमन्त्री योगेश भट्टराईको पालामा उक्त जग्गा भाडामा दिने सम्झौता भएको थियो ।

तर यो थाहा पाएपछि वर्तमान पर्यटन मन्त्री आलेले उक्त निर्णय कार्यान्वयन गर्न रोक लगाएपछि प्रधानमन्त्री देउवाले धन्यवाद दिएकाे मन्त्री आलेले बताए ।

बुधबार बसेको मन्त्रिपरिषद् बैठकमा मन्त्री आलेले धेरै राम्रो निर्णय गरेको भन्दै प्रधानमन्त्री देउवाले उनको प्रशंसा गरेको बताइएको छ । ‘नारायणहिटी दरबार संहग्रहालय परिसरमा रेस्टुरेन्ट चलाउने निर्णय रोकेर राम्रो गर्नुभो’ भन्दै प्रधानमन्त्रीले पर्यटनमन्त्रीलाई धन्यवाद दिएका हुन् ।

तत्कालीन केपी ओली नेतृत्वको सरकारका पालामा बतास अर्गनाइजेसन समूहको बीपीएस लिजिङ एन्ड म्यानेजमेन्ट नामक कम्पनीलाई उक्त जग्गा सस्तैमा भाडामा दिइएको थियो ।

सम्झौतापश्चात हाल त्यहाँ विभिन्न स्थायी संरचना बनाइँदै थियो । बीपीएसले मासिक २ लाख २० हजार मात्र भाडा बुझाउने गरी उक्त जग्गा लिजमा लिएको जनाइएको छ । तर मन्त्री आलेले उक्त निर्णय कार्यान्वयन नगर्न र संरचना निर्माण कार्य स्थगित गर्न निर्देशन दिएका हुन् ।


Last Updated on: January 7th, 2022 at 9:24 am
१९१ पटक हेरिएको

तपाईको प्रतिक्रिया